«

»

Jan 06

Pan’s Labyrinth – மந்திரக் கதவின் ஊடாக போரிலிருந்து வெளியேறுபவனின் குறிப்பு

 

என்னுடைய    சிறுவயது முழுவதும்  மாயாஜால கதைகளாலும் , வீரசாகசக் கதைகளாலும் நிரப்பப் பட்டதாகவிருந்தது . இன்று வரை அவற்றின் தாக்கத்தில் இருந்து மீண்டுவரமுடியாமல் இருக்கிறேன். சிறுவயதின் ஒரு பாகத்தை மேற்கத்திய சாகசக்கதைகளான ராபின்ஹீட் , அலிஸ் இன் வொண்டர்லாண்ட் , கலிவரின் பயணங்கள் , ரொபின்சன்  குருசோ தொடங்கி  பழைய கிரேக்க தொன்ம சாகசக்கதைகளான , ஹர்குலிஸ் ,தீஸியஸ் , ஜேசன் , போன்றனவும்  பின் வந்த குளோனிக்கல் ஒவ் நார்னியா  தொடர் நாவல்களும் , ஹாரிபொட்டர் நாவல்களும் பிடித்துக்கொண்டன. கூடவே மாயவி , டெக்ஸ்வில்லர் போன்ற காமிக்ஸ் கதாபாத்திரங்களும்.

குறிப்பாக வன்னியில் இருந்த காலம் , அங்கே கரண்ட் இல்லை , தொலைக்காட்சி  கணனி வசதிகள் போர் தொடங்கும் போதே   நிறுத்த வேண்டியதாகிவிட்டது . எனவே முழுநேரப்பொழுது போக்காய் எனக்குப்புத்தகங்களேயிருந்தன, இராணுவம் நெருங்கி வர வர ஒவ்வொரு இடமாக இடம் பெயர்ந்து கொண்டிருந்தோம். நாளொன்றின் பெரும்பாலான மணிநேரங்கள்  பதுங்கு குழிக்குள் கழிக்க வேண்டும்.  எனக்கு ஷெல் , கிபிர் என்றால் பயம் .  தூரத்தில் சத்தம் கேட்டாலே கைகால் எல்லாம் நடுங்கத்தொடங்கிவிடும். எனவே பதுங்கு குழித்தனிமையையும் , பயத்தையும் விட்டு எப்படியாவது வேறொரு உலகிற்குள் வெளியேறிச் செல்ல வேண்டி இருந்தது . அதற்கான வாயிலாக மாயாஜால ,  வீரசாகசப்புத்தகங்களே எனக்கு  மந்திரக்கதவுகளாகவிருந்தன. கிளிநொச்சி நூலகம் , உருத்திரபுரம் நூலகம் , விசுவமடு மாவீரர் படிப்பகம் என்று எல்லா நூலகத்திலும் அங்கத்தவராக சேர்ந்து எடுத்து வந்த புத்தகங்கள் கொடுக்கப்படாமலே கிடந்தன . அந்த புத்தகங்களை திறந்து ஒரு மந்திரக்கதவினால் அல்லது ஒரு டெலிபொட்டர் டிவைசினால் வெளியேறுவதைப்போல அந்த பதுங்கு குழிக்குள் இருந்தும் , ஷெல்களும் கிபிர்களும் அக்கிரமித்த வானத்தை உடைய அந்த வன்னிப்பெருநிலப்பரப்புக்குள் இருந்தும்  நான் சுலபமாக வெளியேறினேன்.

சண்டை ஓய்ந்து  முகாம்களில் விடப்பட்ட  பிறகும் முட்கம்பி எல்லைகளுக்குள் வசிக்கும் கூண்டு வாழ்விலிருந்தும் வெளியேற எனக்கு புத்தகங்கள் தேவையாக இருந்தன.  எங்களுடைய முகாம் ஒன்றில் ஒரு பெரியவர் இருந்தார் , வன்னியில் இருந்து எல்லோரும்  உடுப்பையும் , நகை நட்டையும் காவி வந்தோம் ஆனால் அவர் தன்னிடம் சேகரமாகி இருந்த காமிக்ஸ் புத்தகங்கள் , கதைப்புத்தகங்களை இரண்டு பெரிய ரவலிங் பையில் போட்டுகோண்டு வந்திருந்தார் , (அவரைப்பற்றி தனியாக எழுத வேண்டும்) அவரிடம் நட்பாகி புத்தகங்களை வாங்கிக்கொண்டேன். அங்கேயும் அந்த சூழலில் இருந்து  வெளியேற புத்தகங்களினுள் இருந்த மந்திரக்கதவை நான் பயன்படுத்திக்கொண்டேன்.

 

போன வாரம் நிகழ் படம் திரையிடலில் இயக்குனர் Guillermo Del Toro’  வின் Pan’s Labyrinth  படம் திரையிடப்பட்டது. படம் பார்க்கும் போதே  புத்தகங்களைப்பற்றித்தான் நினைத்துக்கொண்டேன்.

Fantasies’ எனப்படும் யதார்த்த உலகும்  கற்பனையுலகும்  கலந்த படம் அது. படம் தொடங்க முதல் இணையத்தில் தேடிய போது ‘Guillermo Del Toro’.  பற்றி அறிந்து கொண்டேன். மிகத்தெரிந்த இரண்டு  படங்களை எடுத்தவர் ‘Hellboy 1 and 2’ படங்கள்  எனக்கு மிகப்பிடித்த படங்கள் இரண்டும்.   தவிர இன்னொரு கொசுறுத்தகவலும் கிடைத்தது . சிறுவயதில் எனக்கு பிரியமான கதைகளுள் C. S. Lewis 1950 களில் எழுதிய நார்னியா(The Chronicles of Narnia) பிரியமானதொன்று  . எழு பாகங்களைக்கொண்ட நார்னியாவின் நான்கு பாகங்களை வாசித்து இருக்கிறேன். 2005 இல் நார்னியா கதைகளை படமாக்கும் படி  இவரிடமே  முதன் முதலில் கேட்கப்பட்டது ஆனால்  Guillermo Del Toro’   அதனை மறுத்துவிட்டார் காரணம் Pan’s Labyrinth   படத்தினை  எடுத்துவிடுதில் அவர் முனைப்பாக இருந்திருக்கிறார் , அவர் நினைத்திருந்தால் அந்த பெரிய பட்ஜெட் கொண்ட ஹோலிவூட் படத்தை தெரிவு செய்து  இயக்கி  பணம் சம்பாதித்து இருக்கலாம் , ஆனால் அந்த கலைஞனின் மூளைக்குள்  Pan’s Labyrinth கதை உட்கார்ந்து கொண்டு குடைந்திருக்க வேண்டும். அதனால் இதனை எடுக்க கிளம்பியிருக்கிறார்.

ஏன் இங்கு நார்னியா பற்றி குறிப்பிடுகின்றேன் என்றால் நார்னியாவுக்கும் Pan’s Labyrinth   இற்கும் நிறைய ஒற்றுமை களும் வேற்றுமைகளும் உள்ளன, ஒற்றுமைகள்  Pan’s Labyrinth   போன்ற படங்களின் பின்னணியை விளங்கவும் , வேற்றுமைகள்  ஏனைய ஹாலிவூட் போன்ற திரை உலகின் படங்களில் இருந்து Pan’s Labyrinth   எப்படி தனியாக விலகி நிற்கின்றது என்பதனையும் விளங்கிக்கொள்ள உதவும். அதற்கு முதல் Pan’s Labyrinth   படம் ஒரு சின்னசுருக்க அறிமுகத்தைப் பார்க்கலாம்.

1944 இல் ஸ்பானியா நாட்டின் உள்நாட்டு யுத்தச்சூழலில் படத்தின் கதை நிகழ்கின்றது.  ஓஃபெலியா என்ற சிறுபெண் படுகாயப்பட்டுக் கிடப்பதில் படம் தொடங்குகிறது. பின்னணியில் ஒரு குரல் அவளது கதையை நமக்குச் சொல்ல ஆரம்பிக்கிறது. பாதாள உலகின் இளவரசியான மோவான்னா, வெளியுலகைப் பார்க்க ஆசைப்பட்டு, அரண்மனையை விட்டுத் தப்பித்து, பூமிக்கு வருகிறாள். ஆனால், சூரிய ஒளியினால் குருடாக்கப்பட்டு, பூமியிலேயே இறந்துவிடுகிறாள். அவளது தந்தையான அரசரோ, தன் பெண் தன்னிடம் திரும்பி வருவாள் என்று அவளுக்காகக் காத்திருக்கிறார்.

ஒஃபெலியாவின் வளர்ப்புத்தந்தை ஒரு ராணுவ அதிகாரி. அவருடைய பணி, ஸ்பானிய கெரில்லாக்களை வேட்டையாடிக் கொல்வது. அவருடைய மனைவி, கர்ப்பமாக இருப்பதினால், தான் இருக்கும் இடத்துக்கே அவரை வரவழைத்துக்கொள்கிறார். கூடவே ஒஃபெலியாவும் வருகிறாள். ஒபிலியா கைகளில் தேவதைக்கதைகள் பற்றிய கதைப்புத்தகங்களை வைத்திருக்கிறாள் , அவள் தேவதைகள்  பற்றியும்  மாயாஜால உலகம் பற்றியும் நம்பிக்கையுடன் இருப்பவள். அல்லது அவ்வுலகங்களுக்குள் சஞ்சரிக்க ஆசைப்படுபவள்.

அங்கு ஒஃபெலியா ஒரு பூச்சியைப் பார்க்கிறாள். அது அடிக்கடி அவளுக்குத் தட்டுப்படுகிறது. அதனைப் பின் தொடர்ந்து செல்லும் அவள், ஒரு  சுழல் போல இறங்கும் குகைக்குள் நுழைகிறாள். அங்கு ஒரு பான்(ஆட்டுதலையும் கால்களும் கொண்ட மனித உருவம் – இதனைப்பற்றி பின்னால் பார்ப்போம்), அவள் தான் மொவான்னா என்றும் தங்களுடைய இளவரசி என்றும் சொல்கிறது. என்று சொல்லி, அதனை அவள் நிரூபிக்கவேண்டும் என்றும், அதனால், அவள் மூன்று வேலைகளை வரும் பௌர்ணமிக்குள் செய்ய வேண்டும் என்றும், அப்பொழுது அவள், தனது தந்தையான பாதாள உலகின் அரசரிடம் சென்றுவிடலாம் என்றும் கூறுகிறது. இக்கதைகளில் மிகுந்த நம்பிக்கையுள்ள ஒஃபெலியாவும் ஒத்துக்கொள்கிறாள்.

அவள் இம்மூன்று வேலைகளையும் செய்யச்செய்ய, அவள் வளர்ப்புத்தந்தையான ராணுவ அதிகாரி, கெரில்லாக்களை வேட்டையாடுவதையும் நாம் காண்கிறோம். இடையில் பல அதிசயங்கள் நடக்கின்றன. முடிவில், அவளுக்கு என்ன ஆயிற்று என்பதே இப்படம். படத்தில் நிஜ உலகில் நடக்கும் சம்பவங்கள் எப்படி  மாயஜால உலகிற்கினோடு தொடர்பு பட்டு கதை சொல்கின்றன என்பதைப்பார்க்க முதல் இத்தகைய படங்கள் பற்றிய ஒரு சின்ன விபரிப்பை பார்க்கலாம்.

பொதுவாக ஐரோப்பியாவிலும் அமெரிக்காவிலும் முதலாம் , இரண்டாம்  உலக யுத்த காலத்திலும் , அதன் பின்னரும் அந்த யுத்தத்துடன் சம்பந்தப்படுத்தி கதைகள் எழுதப்பட்டு பல லட்ச கணக்கில் அந்த கதைகள் விற்று தீர்ந்தன. குறிப்பாக போரின் காலத்தில் போரில் இருந்து வெளியேறி  கற்பனையும் , ஜாலமும் உச்ச அளவில் விரியும் மாயாஜால உலகிற்குள் வாசகரை அழைத்துச்செல்லும் வகையறா நாவல்கள் ஏராளமாக எழுதப்பட்டன. நார்னியா போன்ற நாவல்களும் அவ்வகையினதே . நார்னியா வாசித்தால் அல்லது படம் பார்த்தவர்களுக்கு தெரியும் , குண்டுக்கு பயந்து அல்லது போருக்கு பயந்து தனிமைப்படும் கதாநாயகர்கள் ,ஒரு வளையத்துக்குள்ளோ அலுமாரிக்குள்ளோ நுழைந்து தாங்கள் ராஜாக்களாகவும் ராணிகளாகவும் மாறி சாகசம் புரியும் தேவதையும் மாய விலங்குளும் உலவும் உலகிற்குள் போய் விடுவார்கள் . இத்தகைய கதை உருவாக்கம் ஐரோப்பா முழுவதும் ஒரு  முவ் மெண்டாகவே உருவாக்கப்பட்டு நிகழ்ந்தது , ஏன் இன்று வரை  அத்தகைய புனைவுகளும் , திரைப்படங்களும் எடுக்கப்பட்டுக்கொண்ண்டேயிருக்கின்றன.

 

இத்தகைய புனைவுகளிற்கு மேலைத்தேசத்து  கதாசிரியர்கள்களும் சரி திரைப்பட இயக்குனர்களும் சரி பழைய கிரேக்க உரோம தொன்மங்களை எடுத்து கையாள்வது வழக்கம் , குதிரையும் மனிதனும் சேர்ந்த சென்ரர்கள்(Cantaur) , பறக்கும்  குதிரைகள் (pegasus) , பீனிக்ஸ் பறவை (phoenix) , கிரிபிண்டர்(Grifindor) ,பான்(pan) போன்றவற்றை எடுத்து தங்கள் புனைவுக்குதகுந்தாற்போல் வடிவமைத்துக்கொள்வது வழக்கம்.உலகயுத்தங்களின் பின்னர் போர்க்காலத்தில் இருந்து வெளியேறும் உளவியலை கையாளும் புனைவுகளில் இதனை அதிகம் காணலாம் , நார்னியா தொடங்கி ஹரிபொட்டர் வரை இது தொடர்ந்து வருகின்றது. நார்னியாவில் எனக்கு பிடித்த முக்கியமான பாத்திரம் MR.TUMNUS எனப்படும் பான்.  அதனைப்போலவே ஒரு பான் கதாபாத்திரைத்தை எடுத்து Pan’s Labyrinth   படத்திலுமும் கையாண்டிருக்கிறார் இயக்குனர் Guillermo Del Toro’ . பான் என்பது , கிரேக்க புராணங்களின் படி ஆட்டின் கால்கள் , கொம்பு போன்றவை கொண்ட   ஒரு உருவம் , அது காடுகளைப் பாதுகாக்கும் ஒரு தேவதை என்பதும் அது இசைகருவியொன்றை கொண்டு இனிமையாக இசை மீட்டும் என்பதும்  கிரேக்க புராணங்கள் தரும் தகவல்கள்.

 

பானும் ஒஃசிலாவும்

நான் இவ்வளாவு நேரமும் சொல்வதை வைத்து இது ஒரு மாயா ஜாலங்கள் சிறைந்த வீர சாகசக்கதையென்று நினைத்தால் கண்டிப்பாக நீங்கள் நினைப்பது தவறு , இது நார்னியாவைப்போல ஹரிபொட்டரைப்போல வீரசாகசக்கதையோ மாயாஜாலக்கதையோ இல்லை. இது முற்றிலும் அதிகாரத்து எதிராக , பேசும் படம் .மானுட இரக்கம் , சர்வாதிகாரத்தின் கொடுங்கோன்மை , பண்பு என்பவற்றைப்பேசும் படம்.  இந்த இடத்தில் தான் நார்னியா போன்ற சாகச மாயாஜால புனைவுகளில் இருந்து Pan’s Labyrinth   வெளியேறி நிற்கின்றது . அது சாகசத்தையையோ போரையோ  மாயா ஜாலத்தையோ கொண்டாடவில்லை ,அது மாயாஜாலத்தை கொண்டு நிஜ வாழ்கையில் மானுட குலத்தின் பேரன்பிற்கும் , உறவுகளிற்கும் எதிராக எழும் அதிகாரத்தின் வன்முறையை கேள்விக்குட்படுத்துகின்றது.

அதாவது படத்தில் நடக்கும் மாயஜால உலகம் என்பது சரிக்கு சமனாக யதார்த்தத்தில் நடக்கும் சம்பவங்களையும் மனிதர்களையும் கேள்விக்குட்படுத்துகின்றது.

மாயஜாலம் படத்தின் சுவாரஸ்ய தன்மைக்கும் , மெல்ல நிஜவாழினுள் உள்ளோடி அதன் அபத்தங்களை நைந்து போகச்செய்யும் கேள்விகளை எழுப்பவும் மஜாயாலத்தை கையாள்கின்றார் இயக்குனர். இந்தப்படத்தின் வெற்றியே அதன் நுட்பமான டீட்டெய்லிங்தான். ஒவ்வொரு சின்ன அசைவையும் இயக்குனர் செதுக்கியிருக்கின்றார்.

பிரதான பாத்திரமான சிறுமியும் சரி , அதிகாரத்தி அடையாளமாக நிற்கும் இராணுவ அதிகாரியும் சரி  ஒவ்வொரு பாத்திரமும் , சம்பவங்களும் இடமும் மைநூட்டாக  பிரதான கதைக்குள் உப கதைகளை உருவாக்கிக்கொண்டேயிருக்கின்றது .

எனக்கு படத்தில் மிகவும் பிடிதபாத்திரவடிவம்  அந்த  சிறுமியின்  வளர்ப்புத்தந்தையும்  இராணுவ அதிகாரியுமான Captain Vidal பாத்திரம். மிக அருமையான நடிப்பும் வடிவமைப்பும் கொண்ட பாத்திரம் அது . படம் பார்த்து முடிய உரையாடலில் கிரிஷாந் சொன்னது போல சர்வாதிகாரிக்குரிய பொதுவான குணங்குறிகள் அவனிடமிருக்கும் , ஒவ்வொரு நாளும் (போர்க்காலத்தில் கூட )ஷேவ் செய்து கொள்வது (இது யாரையாவது ஞாபகப்படுத்தினால் நான் பொறுப்பல்ல) தன் மேசையில் ஒரு வெண்கட்டி புதிதாக இருந்தால் கூட கண்டு பிடித்து விடுவது  , தன்னுடைய மரணத்தின் மேல் சதாசர்வ காலமும் பயம் , கட்டற்ற அதிகாரச்செருக்கு  என்று அப்பாத்திரத்தை சுற்றி நிகழும் ஒவ்வொரு நிகழ்வும் இறுதியில் அதிகாரம் எப்படி காலத்தின் வழியே மானுட நேயத்துக்கும் அன்புக்கும் முன்னால் வலுவிழந்து போகின்றது என்பதை சொல்ல இயக்குனர் இப்பாத்திரத்தை மினகெட்டு செதுக்கியிருக்கிறார்.

அது மட்டுமில்லை ஏனைய பாத்திரங்களும் அதுசார்ந்து கட்டப்படும் திரைக்கதை , வசனம் , இசை , சம்பவங்களும் அருமையாக படம் முழுவதும் இயங்குகின்றன.  படம் பெயருக்கு ஏற்றால் போல் ஒரு சுழலைப்போல இயங்குகின்றது . படம் பார்க்கும் போது மைநூட்டாக ஒவ்வொரு விடயத்தையும் அவதானித்தால் படம் இன்னும் சுவாரஸ்யமாக இருக்கும் . படத்தைபற்றி தேடும் போது

fantastical facts about pan’s labyrinth  என்று கொஞ்சம்  எழுதியிருந்தார்கள் .படம் பார்க்கும் போது இந்த இணைப்பையும் ஒரு முறை படித்து விடுங்கள்

http://mentalfloss.com/article/79882/14-fantastical-facts-about-pans-labyrinth

மேலும் முன்பு சொன்னது போல படத்தின் ஒவ்வொரு மைநூட்டான விடயங்களுமே படத்திலிருந்து ஒவ்வொருவருக்கும் ஒவ்வொரு விதமாக கதை சொல்கின்றது . படத்தில் அப்படி எனக்கு பிடித்த இரண்டு விடயங்களை சொல்லி இதனை முடிக்க நினைக்கிறேன்.

படத்தின் இறுதியில் மாயக்கதவை திறந்து வெளியேறத்தக்க வெண்கட்டியால் ஒரு கதவு  சிறுமியின் கட்டிலுக்கு பக்கத்தில் கீறப்பட்டிருக்கும் , ஒரு இரண்டு செக்கன்கள் பிரேமில் அதைக்காட்டுவார்கள் அதைக்காட்டி காட்சி மாறும் அதைப்பற்றிகொஞ்சம் யோசித்துப் பாருங்கள் ஏதாவது பிடிபடுகின்றதா என்று.

அடுத்து சிறுமி தந்தையான அரசரின் உலகிற்கும் போகும் போது ராணியின் கையில் ஒரு குழந்தை இருக்கும் , அத்தோடு அங்கே சுற்றியிருப்பவர்கள் எழுந்து கைதட்டுவார்கள் . இவற்றையும் கவனியுங்கள் படம் முடிந்த பிறகு உங்கள் தலைக்குள் ஏதாவது ஒரு வெட்டுக்கிளி புகுந்து உங்களையும் வேறு உலகிற்கு கொண்டு போகக்கூடும்.

அடுத்து படத்தின் தொழிநுட்ப விடயங்கள் மிக நேர்த்தியானவை  , இப்படத்தின் இசையும் ஒளிப்பதிவும் இரண்டும் நல்ல ஜாலங்கள் என்றே சொல்லலாம். ஒளிப்பதிவு செய்தவர், Guillermo Navarro. இசையமைத்தவர், Javier Navarrete. இப்படத்துக்கு மூன்று ஒஸ்கார் விருதுகள் கிடைத்தன (ஒளிப்பதிவு, ஒப்பனை, கலை). கான் திரைப்பட விழாவில் முதன்முதலில் திரயிடப்பட்டபோது, 22 நிமிடங்கள் வரை கைத்தட்டலும் standing ovationனும் இப்படத்துக்குக் கிடைத்தது என்றும் படத்தைப்பற்றி தேடும் போது படித்தேன்.

அதிகாரத்துக்கு எதிராக மாயாஜாலத்தை நிறுத்துவது அல்லது அதிகாரத்தை ,புனைவின் ஊடாக நெகிழ்த்திச்சாய்பது எனும் இவ்வகையான நுட்பங்கள் ஹோலிவூட் வணிக படங்களினைப்போல் இல்லாமல் , யதார்த்தத்தில் நின்று மானுட குலம் அன்பு மற்றும் மனிதக் கூட்டுபோராட்டம் மூலம் நடத்தும் மானுடத்தின் போராட்டத்தை இது போன்ற படங்கள் பேசுதல் அழகானதும் கனதியானதுமான செய்திகளை இரசிகனுக்குள் விதைக்கும். இத்தகைய படைப்புக்கள் தொடர்ச்சியாக வரவேண்டும் .

படம் திரையிட்டதற்கு நிகழ்படத்துக்கும் உரையாடிய நண்பர்களுக்கும் என் நன்றியும் அன்பும்.

-யதார்த்தன்-

 

 

.

Leave a Reply